Timewarpað aftur með sjálfum O´Brien

15. júlí.

Já, við fórum sumsé á Rocky Horror í gærkvöldi. Þetta var síðasta sýning leikflokksins á þessu sumri og endapunktinn settu þeir í New Victoria Theatre í Woking, 40 mílur héðan frá Reading. Ég veit ekki hversu margir Rocky Horror-aðdáendur lesa þessa síðu en ég hef elskað Rocky Horror frá því ég sá myndina fyrst fyrir u.þ.b. 30 árum. Fór gjarnan á miðnætursýningar í Nýja bíói í gamla daga og þá að sjálfsögðu með göróttan drykk innanklæða. Uppfærsluna á sviði sá ég fyrst í London fyrir nokkrum árum.  

Bretar líta á þessa sýningu sem "cult" og mæta að sjálfsögðu í viðeigandi klæðnaði. Allir kunna stykkið utanað og taka ósvikið þátt í gamninu. Það er leyfilegt að taka með sér allskonar hluti svo sem gúmmíhanska,  hrísgrjón, vatnsbyssur og ljós og svo verður auðvitað að vita hvenær maður á að öskra. Ef Janet er nefnd á nafn æpir lýðurinn "slut" og þegar Brad er nefndur öskra allir "arsehole". Dr. Scott fær "Sieg heil" í hausinn og sögumaðurinn er púaður niður í hvert skipti sem hann birtist. Allir standa upp og dansa Timewarpið og veifa ljósunum sínum þegar lagið "There's a light" er sungið. Með árunum hafa bæst við allskyns frammíköll sem eiga við á hverjum tíma.

Uppfærslan í gær olli ekki vonbrigðum og þar sem þetta var síðasta sýning að sinni voru áhorfendur venju fremur uppivöðslusamir. Ég gerði tilraun til að taka mynd eftir að sýningin hófst en var umsvifalaust hundskömmuð af fílefldum öryggisverði. En djö... hvað við fíluðum okkur vel.

Og svo kom hápunkturinn!!! Þegar sýningunni var lokið og leikararnir búnir að hneigja sig skrilljón sinnum mætti sjálfur Richard O'Brien á sviðið. Fagnaðarlátunum ætlaði aldrei að linna, en svo söng hann hvert lagið á fætur öðru og "Riff-Raffaði" með leikaranum sem lék hann í þessari sýningu. Blaðamaðurinn í mér nötraði af löngun til að fara baksviðs og fá viðtal við stjörnuna en brjóstabarnið beið hungrað heima. 

Ég var hás af öskrum eins og allir hinir í leikhúsinu og á bílastæðinu hljómaði tónlist og söngur úr hverjum bíl. Ólýsanleg stemmning. Ég hvet eindregið þá sem eiga leið um England að ári að fletta upp www.timewarp.org.uk og athuga hvort  ekki séu einhverjar sýningar í gangi í London eða næsta nágrenni. Það er einstakt tækifæri til að fá útrás fyrir litla perrann í sér og ath.!!! Ekki klikka á átfittinu.

Ég set inn nokkrar myndir af þessari skemmtilegu upplifun fyrir þá sem hafa áhuga. Albúmið heitir Rocky Horror.

Annars gekk barnapössunin ágætlega hjá ensku ömmu og afa, þau voru soldið búin á því þegar við komum til baka, en Annica hafði sýnt á sér margar hliðar, brosað, hjalað, verið ergileg og beinlínis öskureið. Það leyndi sér ekki gleðin þegar mamma kom heim og Annica bókstaflega henti sér á brjóstið.

Í dag er þrumveður í Englandi og við erum bara að dunda við sitthvað smálegt og ná okkur niður í rólegheitum eftir lætin í gærkvöldi. Ljúft.

Athugasemdir

[Guðríður Hrefna Haraldsdóttir, 15.7.2007 kl. 16:19]

Rosalega hefur þetta verið skemmtilegt!!! Ég bjó úti í London (au pair) þegar þetta stykki var fyrst sýnt og skólafélagi minn var stórhrifinn. Sé svolítið eftir að hafa valið að sjá þarna fræga Agöthu Christie-stykkið á 24. ári þegar ég mátti velja mér í afmælisgjöf að fara í leikhús. Held að þetta hefði verið meiri háttar upplifun. Kíki í myndaalbúmið þitt á eftir. 

[edda (IP-tala skráð) 15.7.2007 kl. 16:39]

Ekki örvænta, elsku stelpan mín, það er aldrei of seint. Þeir eru held ég enn að sýna Músagildruna en þessi sýning er líka alltaf í gangi af og til og ég fullvissa þig um að hún er þess virði að sjá. Vonandi verður þú heppin í London næst og mundu að dressa þig ærlega upp. Það er eins og að verða barn aftur

[Heiða Þórðar, 16.7.2007 kl. 00:11]

Komin  með fráhvarfseinkenni svo langt síðan ég hef farið á söngleik....