Af kuklurum og föndurgerð

9. júlí.

Ég reikaði inn á kuklráðstefnu hér í Reading í gær og á móti mér tók gæðaleg kona sem leiddi mig rakleitt að borðinu hans Davids sem les í lófa. Þegar ég opnaði lófana blasti við David hvað ég væri mikil hagleikskona og fim í höndunum. David var auðvitað ekki viðstaddur jólaföndrið á leikskólum barnanna minna. Það eru martraðarkenndustu minningar lífs míns. Þegar heilu jólasveinafjölskyldurnar stóðu tilbúnar og brosandi á næstu borðum var ég að slást við lím og klístraða fíltbúta sem festust allstaðar, börnin mín með skeifu og ég gráti nær. Yfirleitt kom einhver mamman eða fóstran til bjargar. David reddaði sér fyrir horn eins og Þórhallur miðill og sagði að ég ætti enn eftir að uppgötva þennan hæfileika. Dö! Ég var einu sinni á listaskóla í Bretlandi og tókst á heilum vetri að búa til ljótustu leirkerlingu sem sögur fara af og það með dyggri aðstoð Linusar hins sænska sem var næstur mér í stofunni og í meðvirknikasti allan tímann.

David sá líka að ég yrði aldrei rík en væri trúlega á leið til Ástralíu eða Norður-Ameríku (??!!). Ég væri voðalega vel heppnuð svona almennt séð og aldrei að vita nema stóra ástin dytti í fangið á mér innan þriggja ára.  Ég þakkaði pent og valhoppaði fagnandi mót bjartri framtíð.

 

Athugasemdir

[Alda (IP-tala skráð) 9.7.2007 kl. 16:41]

AhHa, ég náði þessu alveg með N-Amerikuna. Þú ert semsagt á leiðinni hingað. En hvað verður gaman að sjá þig.

[edda (IP-tala skráð) 9.7.2007 kl. 17:51]

Já, þú segir nokkuð. Sennilega verður það Ameríka næst eftir allt saman. Vona að allt sé í ljómanum hjá þér elsku kerlingin mín. Hugsa oft til þín. Sjáumst

[Halla (IP-tala skráð) 10.7.2007 kl. 15:40]

Já var einmitt að ræða þetta í síðasta sálfræðitíma, veit ekki hvort ég muni einhvern tímann ná mér andlega eftir þessar þolraunir sem jólaföndrið var, sálinn þurfti að gefa mér róandi, þetta var svo átakanleg upprifjun. Bara ef þú hefðir kunnað föndra mamma, þá hefði æska mín öll verið mikið auðveldari!  (hehehehehehe).

Elska þig !!!