Ja, hérna hér

Þegar ég fór út í morgunsólina í morgun með heilsudrykkinn, kaffið og sígaretturnar (hollusta og óhollusta í hárréttum hlutföllum) var ég að reyna að rifja upp hvernig ég gerði hinar rómuðu brauðtertur hér um árið. Undirbúningur fyrir veisluna stendur sumsé sem hæst og í kvöld er fundur, segi og skrifa fundur, til að fara yfir dagskrána og skemmtiatriðin. Langamma er búin að baka dýrindis tertur og einhver tantan, sem er kökuskreytingamaður, skreytir terturnar með nafni barnsins og sykurleikföngum. Í gærkvöldi sátum við Anna Lilja (með maska á andlitinu) og pökkuðum inn marglitum sykurmöndlum sem eiga að vera við hvern disk ásamt litlu sætu korti. Gestirnir taka það svo með sér þegar þeir fara heim. (Sjá mynd af Önnu Lilju fögru með maskann!!!)Skírnarkjóllinn, sem var saumaður upp úr brúðarkjól ömmunnar, er nýþveginn og straujaður á herðatrénu og nú verð ég hreinlega að ákveða hvað ég ætla að gera skemmtilegt í þessari veislu svo ég verði ekki eins og þorskur á þurru á fundinum í kvöld. Dans og söngatriði eru þegar á dagskrá svo og ræður og ljóðaflutningur, þannig að ég er soldið mát.

Annað og óskylt. Þegar ég fer inn á bloggsíður annarra sé ég að þeir eiga sér gommu af bloggvinum. Einhver sagði mér að ég ætti bara að fara inn á síðurnar og spyrja hvort viðkomandi vildi verða bloggvinur minn. Af meðfæddri hógværð og látleysi get ég það auðvitað ekki en auglýsi engu að síður eftir skemmtilegum bloggvinum, ef einhverjir bloggarar slysast inn á þessu síðu.

En nú þýðir ekki að sitja og lesa og eins og segir í kvæðinu heldur láta hendur standa fram úr ermum. Ég er skíthrædd um að terturnar misheppnist því hér er ekkert Gunnarsmajones, en ég geri mitt besta.

 

Athugasemdir

[Tóti (IP-tala skráð) 2.6.2007 kl. 14:21]

Edda mín,

það er fátt jafn hallærislegt og að eiga bloggvini og það er greinilegt að eftir því sem bloggarar eiga fleiri slíka vini þá eru þeir andlausari og leiðinlegri. Fullkomlega einskisverðir pennar.

Enga hjarðhugsun í majonesleysinu í UK. Það er ekki þinn stíll og hefur aldrei verið.

Hafðu það sem allra best og njóttu þess að vera ekki á Íslandi. Ekki einu sinni Gunnars majones gerir lífið hér bærilegt.

Tóti 

[edda (IP-tala skráð) 4.6.2007 kl. 12:46]

Takk elsku Tóti minn. Örfáar línur frá þér gera lífið sannarlega bærilegra. Þú ert æði og reyndu að þrauka þarna heima. Annars ertu alltaf velkominn til Englands, ég tæki þér að sjálfsögðu fagnandi. Lifðu heill, elsku vinur.

[Halla (IP-tala skráð) 4.6.2007 kl. 16:52]

Var enginn búinn að segja þér að brauðtertur eru löngu orðnar úreltar? Síðasta veisla sem þú hélst með brauðtertum var væntanlega fermingin mín, veistu hvað er langt síðan það var? Brauðtertur eru fyrir gamalt fólk mamma! Og miðað við skipulagninguna á þessari nafnaveislu (sem notabene er ekki einu sinni skírnin sjálf) hálfpartinn svimar mig við tilhugsunina um þegar þið mömmurnar þ.e. þú og Kate komið saman til að skipuleggja brúðkaup foreldranna. Vertu allavega viss um að ef ykkur dettur í hug að útbúa brauðtertur fyrir brúðkaupið verður ykkur samstundis meinaður aðgangur að brúðkaups skipulagsnefndinni, ég skal sjá til þess!!

 Ég elska þig samt brauðtertumamma mín!! Knús til allra!!

[Inga Lára Helgadóttir, 5.6.2007 kl. 00:36]

Edda, haltu áfram að gera brauðtertur alltaf þegar við hér erum með veislur eru alltaf tvær brauðtertur og svo oftast eitthvað heitt líka og svo einnig sætar kökur, en brauðið.... það klikkar aldrei Guð ég alveg verð svöng að hugsa um brauðtertur, kannski að ég geri eitt rúllubrauð um helgina

En mikið er gaman að lesa um ykkur þarna úti, langar rosalega að vera þarna með ykkur. Ég man svo vel hvernig allt er þarna úti (eða held það allavega) og ég hef oft látið hugann reika um bæinn eins og ég minnist hans

Vest að ég er aldrei orðið hérna inni, er á vöktum á spítalanum og næ sjaldan að vera á msn að spjalla við Önnu Lilju, enda hefur hún örugglega mart  annað við tímann að gera þessar stundirnar
Hugsa mikið og hlýtt til ykkar,

Inga Lára  

[edda (IP-tala skráð) 5.6.2007 kl. 08:45]

Brauðtertur hafa aldrei slegið annað eins í gegn og þessar. Mun blogga um það síðar. Þegar þú giftir þig, Halla mín, kem ég hlaðin brauðtertum í veisluna.!!!! Og ég elska þig líka!!

Og takk fyrir falleg orð Inga Lára mín. Alltaf gaman að heyra frá þér:)

[Alda (IP-tala skráð) 6.6.2007 kl. 02:21]

Hvað er þetta, þarf maður nú að vera stærðfræðingur til að skrifa hér. WTF.

Hvað er annars að frétta, verður að leifa manni að fylgjast með hvað þú ert að bralla kona. Hvar ertu stött núna.

Hér skín sólin og vel heitt.

Knús og kram, Alda, FL